A partir da l'onn 1870 è entrà en vigur in nov «reglament per il stabiliment d'arrest en il Sennhof». Tenor quel survegnivan ils praschuniers e las praschunieras la damaun - avant l'entschatta da la lavur a las 6.00 - ina schuppa da farina. La saira devi ina schuppa da giutta u ina schuppa d'avaina resp. ina schuppa da ris cun fava u tartuffels. Da mezdi era la variaziun pli gronda: la dumengia e la gievgia vegniva sin maisa charn cun verdura, ils auters dis per il solit schuppa da giutta u da ris cun fava e tartuffels. Pervi da l'obligaziun da taschair na pudevan ils praschuniers e las praschunieras dentant betg discurrer in cun l'auter davart l'offerta culinarica.

L'urden da chasa dal 1927 menziunescha intginas midadas: ils umens e las dunnas survegnivan la damaun «ina purziun café cun latg u tschigulatta». Ultra da quai devi sper la charn er ina giada l'emna liongias cun verdura u pulenta.

Enturn il 2015 na datti naginas reglas severas pli per il plan da menu. Ils praschuniers e las praschunieras survegnan trais pasts principals - tut tenor il stadi da sanadad u la religiun - era dieta leva u in'alimentaziun speziala. La direcziun da la praschun metta gronda paisa sin tschaveras saunas e variadas en quantitads suffizientas. Da quai pudevan ils praschuniers e las praschunieras en il 19avel tschientaner mo siemiar.