Suenter che la chasaforz è vegnida averta l'onn 1817, è il Sennhof adina puspè vegnì transfurmà durant ils 200 onns suandants. A l'entschatta penetrava strusch sulegl ed aria frestga en las cellas bassas e per part umidas. Ils praschuniers privlus vegnivan en cellas d'isolaziun. Enturn il 1830 stuevan quels main privlus parter ina stanza cun fin tschintg autras persunas. Ina cella cuntegneva da quel temp: vaschella da mangiar e da baiver, in vasch da notg ed ina curuna. Anc il 1851 eran stgaudablas mo set da las 25 cellas.

Il 1870 disponivan las cellas era d'ina maisa, d'ina sutga e d'ina matratscha da strom, ma fin il 1932 da nagina glisch electrica. Anc 30 onns pli tard n'avevan ils arrestads e las arrestadas naginas tualettas en las cellas d'isolaziun. Ils basegns stuevan els far en sadellas. En il 21avel tschientaner èn las cundiziuns alura sa meglieradas fermamain. Las cellas stretgas avevan ussa tuttas aua, tualetta, electricitad; ultra da quai dastgavan ils praschuniers e las praschunieras fimar, guardar televisiun, tadlar radio ed abunar gasettas.