Anc enturn il 1800 na devi en il Grischun nagina praschun chantunala, malgrà ch'ina tala fiss tuttavia stada necessaria. La populaziun n'aveva gia da lez temp betg grond plaschair da laschar construir ina tala en sia vischinanza. Il Chantun exportava ses praschuniers en stabiliments externs, tranter auter en la vischnanca svevaisa dad Oberdischingen sper Ulm. Ma quests «exports» eran fitg chars. Perquai han ins tschertgà ina soluziun ch'era pli damanaivla e favuraivla.

L'onn 1817 ha il Chantun acquistà l'areal dal Sennhof a Cuira per 11'500 guldas ed ha construì là per l'emprima giada ina «chasaforz». Las infurmaziuns necessarias davart il manaschi d'ina tala praschun ha il Chantun sa procurà da Turitg – incl. tips davart la segirezza, l'alimentaziun e l'igiena. Sco clientella s'imaginava la Regenza grischuna praschuniers che stuevan seser giu chastis da plirs onns. Ma bainbaud eran serrads en il Sennhof er umens e dunnas che avevan commess delicts pli pitschens. Fin il 1865 stuevan ils praschuniers e las praschunieras anc purtar chadainas.