Davart l'istorgia tempriva dal Sennhof è enconuschent pauc. Dadens ils mirs da la citad era domicilià qua probablamain in manaschi agricul cun economia da latgiras. Da quel deriva er il num «Sennhof».

Il 1603 è l'entir cumplex vegnì en possess dal maister monetari Hans Jakob Wegerich von Bernau (1562–1606). Quel ha laschà realisar là in crap da vopna cun sias inizialas «I – W V B 1603» ed in urs en la tavla eraldica. Quest crap sa chatta dapi passa 400 onns sur il portal ad artg dal Sennhof. Oz è el dentant fitg smaglià da l'aura.

Gia il 1612 è il possess vegnì vendì a la famiglia Menhardt ch'è stada proprietaria fin il 1730. Silsuenter ha il Sennhof midà pliras giadas possessur. Avant ch'il chantun Grischun ha acquistà il Sennhof il 1817, era sa domiciliada là ina savunaria sper ina retscha d'abitaziuns.