Ina citad medievala stueva sa proteger dals inimis externs cun fortificaziuns. Perquai ha Cuira survegnì in mir da la citad durant l'emprima mesadad dal 13avel tschientaner. Pliras turs rinforzavan il mir da tschinta che sumegliava in cor. L'entschatta dal 16avel tschientaner èn las fortificaziuns vegnidas renovadas. En quest connex han ins construì la tur dal Sennhof odierna che tutga perquai tar las turs pli giuvnas da la fortificaziun da la citad. I n'è betg enconuschent, sch'i deva gia ina tur medievala precedenta.

La tur dal Sennhof è radunda. Grazia a questa furma ha ella pudì tegnair pitg meglier al bumbardament dals chanuns . Era las balestreras correspundevan a las novas pretensiuns da la tecnica militara: ellas n'eran betg adattadas per balesters, mabain fatgas per armas da fieu da maun.

Il fossal sitg da la citad s'extendeva fin a la tur dal Sennhof. Sch'ins stueva sa defender, pudev'ins emplenir el almain per part cun aua. Durant l'emprima mesadad dal 19avel tschientaner ha il mir da la citad pers tut sia impurtanza ed è vegnì mantegnì mo anc a moda manglusa. Gia il 1847 era sballunada la part tranter la tur dal Sennhof ed il Schanfigger Törli.