L'onn 2020 han ins fatg in'exchavaziun archeologica d'urgenza sin l'areal dal Sennhof. Là han ins scuvert structuras da simplas construcziuns da lain e d'installaziuns artisanalas, blers products mezfinids e restanzas da l'elavuraziun dad ossa, da metal e da vaider, ma era guaffens. Al pe da la collina da la curt da Cuira devi damai en l'indeschavel tschientaner lavuratoris ed ufficinas. En quels creavan mastergnants cun ossa, arom, zin, fier e vaider tocca per mobiglias, vestgadira e bischutaria. Ina furma da cular rara, construida da crap, cun crucifix ed evla, lascha supponer ch'ins produciva qua er objects religius. Per far ferradira elavuravan ils umans surtut l'ossa d'arments e da chavals/mils sco era cornas-tschierv. I deva sin l'areal era manaschis che elavuran products sco textilias, charn, tgirom e laina. Ma pervia da la passageritad dals products èn quels difficils da cumprovar.