Da la citad da Cuira aud'ins savens ch'ella saja «la pli veglia citad da la Svizra». Quai ha da far surtut cun la lunga istorgia d'urbanisaziun sin il territori odiern da la citad da Cuira. Ils pli vegls mussaments da preschientscha umana han ins chattà damanaivel dal Sennhof, sut la collina da la curt: qua èn gruppas mobilas da chatschaders e rimnaders adina puspè sa domiciliadas temporarmain a la fin da l'ultim temp da glatsch, pia gia avant passa 10 000 onns. Ma era l'areal dal Sennhof è gia baud stà colonisà d'umans. Durant las exchavaziuns l'onn 2020 han ins chattà qua ils pli vegls mussaments, numnadamain gronds foss da fieu. Els tanschan enavos fin a l'entschatta dal 5avel tschientaner a.Cr., en il temp neolitic. Blers millennis pli tard han ils umans erigì qua pitschens abitadis cun chasas stablas, surtut en il 2./1. millenni a.Cr. (temp da bronz/fier). En il temp medieval tempriv era quest territori in lieu da sepultura.