Lungs dis da lavur tutgavan davent da l'entschatta tar il mintgadi dals praschuniers dal Sennhof. Els avevan da far lavurs en il spazi public, p.ex. nettegiar las vias. Questas lavurs èn dentant vegnidas sistidas cun il reglament dal 1870 - pervia dal grond privel da fugia. Ils temps da lavur da lez temp: la stad a partir da las 6.00, l'enviern a partir da las 7.00; la saira fin las 18.30 resp. 19.30 – temps da lavur ch'eran usitads er en la citad da Cuira. Ils umens survegnivan per lur lavurs (taisser u autras lavurs artisanalas) mintga di 8 raps; las dunnas per cuser, far cun stgaina e filar 5 raps. A partir dal 1927 han ils praschuniers era puspè pudì lavurar ordaifer il Sennhof. Las dunnas gidavan a far la laschiva en la lavandaria.

Il 2017 èn ils praschuniers e las praschunieras vegnids confruntads cun temps da lavur pli umans: da las 7.30 fin las 17.05. Las activitads attribuidas ad els duevan en il cas ideal correspunder a lur abilitads. Ils praschuniers e las praschunieras lavuravan a la fin en il Sennhof surtut en ils secturs scrinaria, industria (confecziunament ed emballadi) ed economia (cuschina, lavandaria). La paja per la lavur dependeva da l'engaschi e da la disciplina; ella muntava en media a var 30 francs al di.