Suenter avair decis da spustar il 2020 la praschun dal Sennhof a Cazas, ha il chantun Grischun lantschà il 2018 ina concurrenza d'investurs. La finamira da quella è stada da chattar il meglier concept per ina nova utilisaziun dals bajetgs e da l'areal. Gudagnà la concurrenza ha il project «Kontinuum» da l'investur «Einfache Gesellschaft Sennhof». Quella consista da la Brandis Investment AG, Maiavilla, e da la Miro Immo AG, Cuira. Il biro d'architectura Ritter Schumacher AG, Cuira, ha planisà la restructuraziun da l'areal.

In aspect central dal «Kontinuum» è stà da mantegnair il tract en furma d'artg ed ils edifizis lung la Via dal Sennhof, per ch'il nov areal furmia - tenor ils planisaders - ina cuntinuaziun da la citad veglia. La curt interna para bler pli generusa grazia a sia avertura vers las vignas. Tenor ils investurs duai la nova part da l'edifizi cun abitaziuns esser in engrondiment cuntinuà dals bajetgs existents - in continuum che collia il vegl cun il nov. Il nov Sennhof na dueva ni daventar in quartier mo per pernottar ni in quartier mo per far cumpras, mabain ina pitschna citad en la citad, cun restaurant, butias, stanzas d'abitar e locals da cultura.