Suenter lavurs da transfurmaziun da plirs onns è il nov Sennhof sa preschentà il matg 2023 a la publicitad: dus «dis da las portas avertas» han offert in program varià cun visitas guidadas, exposiziuns e concerts. Las numerusas visitadras ed ils numerus visitaders èn stads surstads da vesair co che la praschun a l'ur da la citad veglia da Cuira è sa transfurmada.

Là, nua ch'ins ha stgarpà giu ina part dal vegl Sennhof, sa chatta uss in edifizi nov da tschintg plauns cun 29 abitaziuns. Daspera s'avra l'areal en direcziun da las vignas. Quai ch’è restà èn la tur da plirs tschientaners ed il tract en furma d'artg. En il plaunterren da quel è endrizzada ussa la scharmanta KostBar che cumbinescha ustaria, bar e lounge. En las etaschas sura sa chatta il hostel  Bogentrakt: cun settanta letgs en 25 chombras, en las qualas ins entra tras las anteriuras portas d'atschal da las cellas. Lung la Via dal Sennhof datti pitschnas butias e differents ateliers - e la Fundaziun Capauliana expona qua ses archiv da maletgs dal Grischun. Il nov Sennhof è in enritgiment multifar per la citad da Cuira. In lieu avert che envida da s'inscuntrar.