La praschun a l'ur da la citad veglia da Cuira è stada confruntada dapi sia existenza cun transfurmaziuns architectonicas. Perquai ch'il Sennhof n'era betg vegnì construì oriundamain sco praschun, èsi stà difficil da procurar per cundiziuns d'arrest adattadas. 200 onns a la lunga è il Sennhof adina puspè stà in grond plazzal: transfurmaziuns da las cellas, auzament da parts dal bajetg, creaziun da locals da temp liber, etc. Insacura èsi dentant stà cler ch'il Sennhof na po betg satisfar a las pretensiuns odiernas d'ina praschun, malgrà las modernisaziuns - surtut quai che reguarda la segirezza. Suenter discussiuns durant decennis han ins perquai decis da serrar la praschun a Cuira.

En il 21avel tschientaner vegnan construidas novas praschuns per ordinari ordaifer ils centers da las citads. En territoris rurals hai dapli spazi liber ed ils pretschs dals bains immobigliars èn pli favuraivels. Il chantun Grischun ha realisà cun il stabiliment giudizial Cazas Tignez ina praschun moderna. Ils temps dal Sennhof sco praschun èn definitivamain passads dapi il 2020.