Il Sennhof n'è da nagin temp stà ina praschun particularmain segira. Anc a l'entschatta dal 21avel tschientaner èn reussidas duas fugias classicas: il 2001 han dus praschuniers resgià tras ils fists dal giatter ed èn scappads sur il tetg. Otg onns pli tard han dus praschuniers sdrappà il giatter da la fanestra or da la francada ed èn sa laschads giu dal segund plaun sura cun lenziels liads ensemen. Pli extraordinaria è stada la tecnica d'in auter praschunier: cun chit da fanestras ha el creà ina copia d'ina clav da segirezza e silsuenter fatg a basa da quella ina nova clav - ed è scappà tras la porta. Il «retg da la fugia» dal Sennhof è dentant Johann Stoffel, naschì il 1899 a Val. Il 1929 è reussida ad el in'infracziun nunusitada: Stoffel è raivì sur in chanal dal tetg e tras ina fanestra da biro en il Sennhof, ha engulà 400 francs ed in revolver. Pauc pli tard è el vegnì arrestà en la praschun, en la quala el era rut en. Il di suenter è el scappà dal Sennhof, è puspè vegnì tschiffà ed è anc ina giada scappà. La populaziun è sa divertida da quests eveniments ed uschia ha Stoffel schizunt fatg parada sin la plachetta da tschaiver uffiziala da Cuira il 1930. Dapli contribuziuns sur dal Sennhof: Link