Ses daners ha el gudagnà cun ils extraterresters. Decennis a la lunga ha el scrit sur dad els e vendì milliuns cudeschs en l'entir mund - uschè blers sco nagin auter Svizzer. Bleras da las tesas dad Erich von Däniken, naschì il 1935, èn dispitaivlas. Tenor sias publicaziuns èn arrivadas avant annorums creatiras d'in planet ester sin la Terra, èn sa multiplitgadas qua ed han influenzà l'istorgia da l'umanitad. Blers bajetgs preistorics sajan stads realisabels mo cun l'agid dad extraterresters.

Cura che ses emprim cudesch «Erinnerungen an die Zukunft» ha cuntanschì il 1968 l'emprim plaz sin las glistas dals bestsellers, era Erich von Däniken en praschun: trais onns e mez arrest – pervi da defraudaziun, engion professiunal e falsificaziun da documents. En sia cella en il Sennhof ha el scrit il 1969 ses segund cudesch: «Zurück zu den Sternen». Las cundiziuns d'arrest a Cuira sajan stadas acceptablas, ha el raquintà pli tard. El saja dentant sa vilentà ch'ins haja prendì davent ad el il radio la saira avant l'emprima tschentada sin la glina – gist ad el, ‘l'expert’ per planets esters. Suenter in onn e mez è el vegnì relaschà pervi da sia buna demananza ed el ha puspè pudì sa deditgar als extraterresters.