L'onn 1963 han ins cumenzà a far transfurmaziuns cumplessivas ed urgentas en il Sennhof. Fin otg praschuniers durmivan da quel temp anc ensemen en ina sala cun sulettamain ina tualetta ed in pitschen lavabo. La part da l'edifizi a la Via dal Sennhof è vegnida auzada per in plaun incl. abitaziun per l'administratur ed il primsurvegliader. La midada la pli marcanta è stada la construcziun d'in nov tract da cellas ch'exista anc oz: il tract en furma d'artg cun il hostel e la KostBar.

Enturn il 1970 hai dà novs lavuratoris, locals per il temp liber e stanzas da cuminanza per ils praschuniers e las praschunieras e cellas supplementaras per las dunnas. L'entschatta dals onns 1990 han ins fatg ulteriuras renovaziuns impurtantas. D'ina vart n'era la segirezza a l'entrada principala betg garantida fin là, cunquai ch'i na deva nagina sclusa da segirezza; tranter auter era il secretariat expost ad in privel nunresponsabel. Da l'autra vart eri necessari d'engrondir las stanzas per las visitadras ed ils visitaders, cunquai che las novas directivas permettevan temps da visita pli frequents. Ultra da quai han ins vulì reducir il privel da fugia en differents secturs.