El è daventà famus cun in mazzament ch'el ha commess cun 26 onns: il favrer 1936 ha il gidieu David Frankfurter schluppettà a Tavau Wilhelm Gustloff, il manader da la gruppa naziunala da la NSDAP en Svizra. Il giuven Frankfurter aveva vis co ch'ils nazis antisemitics avevan surpiglià l'entschatta dal 1933 la pussanza en Germania. Pauc pli tard era el emigrà en Svizra. Cun ses attentat ha el vulì metter in signal cunter la persecuziun dals gidieus ed il sistem criminal dals nazis. Suenter il mazzament da Gustloff è el sa denunzià tar la polizia svizra.

Il december 1936 è el vegnì sentenzià a Cuira a 18 onns praschun (cun expulsiun suandanta). La Regenza svizra ha refusà da surdar el al reschim dals nazis. La stad 1945, curt suenter la fin da la Segunda Guerra mundiala, ha el pudì bandunar il Sennhof, ha dentant era stuì bandunar la Svizra. Frankfurter è emigrà a Tel Aviv ed è daventà pli tard uffizier en l'armada israeliana. Il chantun Grischun ha annullà l'expulsiun cunter el l'onn 1969. David Frankfurter ha - ultra da la praschun - stuì pajar in aut pretsch per ses attentat: ils nazis han torturà e mazzà ses bab l'onn 1941 en in act da vendetga.